* Aхәаша, 23 Лаҵара 2025

Уи иахҟьаны, азеижәтәи ашәышықәсазы зықь-ҩыла аҧсуаа рҭоурыхтә ҧсадгьыл ааныжьны ицар акәхеит Ҭырқәтәылеи ааигәатәи мрагылара атәылақәеи рахь. Аҧсуа мҳаџьырқәа рхылҵшьҭрақәа адунеи ҩынҩажәи жәаба ҳәынҭқарра рҟны инхоит. Зегь реиҳа аҧсуа диаспора рхыҧхьаӡара рацәоуп Ҭырқәтәыла. Амҳаџьырқәа ргәаларшәара амш аҽны Аҧсадгьыл ахь ахынҳәразы аҳәынҭқарратә еилаки Омар Беигуа ихьӡ зху аҳәаанырцәтәи аҧсуаа рҭоурыхтә музеи аусмҩаҧгатәқәа жәпакы еиҿыркааит. Атема иацылҵоит Шьазина Ханагәуаҧҳа.

Уажәааигәа Аҧсны Ахада Бадра Гәынба Кәтол ақыҭа Ҭоумышь аҳабла ачаи культура аиҭарҿиара иаҿу анаплакыҩцәа дырҭааит. Ирыгу–ирыбзоу дазҵааит. Анаплакы аҧшәмацәа Адгәыр Гьергьиеи Алиас Асланӡиеи Аҧсны Ахада изеиҭарҳәеит раалыҵ аҭираҿы ауадаҩрақәа шрымоу. Бадра Гәынба ацхыраара шриҭо ала иақәиргәыҕит, иагьынаигӡеит. Ажәабжь иацылҵоит Амра Зарандиаҧҳа.

Абри ахыҧхьаӡара аҟынтәи ажәабатәи Ашьхаруаа рышкол аушьҭымҭацәа х-ҩык хьтәы медалла иалгеит. Анна Аҩӡыҧҳа, Наала Бжьаниаҧҳа, Алиса Быҭәҧҳа. Рыхҩыкгьы Аҟәа ақалақь ахадара ахьӡала 50–50 нызқь мааҭ аҧара ранашьоуп. Баграт Шьынқәба ихьӡ зху актәи абжьаратә школ аҿы акәзар, 59-ҩык алгеит. Аушьҭымҭацәа зегьы азанааҭқәа алырххьеит. Урҭ рыбжьара иҟоуп Иреиҳаӡоу аҵараиурҭақәа ирҭалахьогьы. Аҵыхәтәантәи аҵәҵәабжьы ргәы хыҭ-хыҭуа иазыҧшын зегьы. Аҿар ргәырҕьара рыцеиҩылшаразы ашкол даҭааит Аҧсны аҵара аминистр Хана Гәынҧҳа.

Араҟа аушьҭымҭацәа ирыдныҳәалоз рхыҧхьаӡараҿы дыҟан Аҧсны Ахада ихаҭыҧуаҩ Беслан Бигәаа.

Атәыла Ахада Бадра Гәынба Гәдоуҭатәи актәи абжьаратә школ аушьҭымҭацәа аҵаратә процесс ахыркәшара хаҭала ирыдиныҳәалеит.