* Aмҽыша, 11 Лаҵара 2025

«Аиааира ашәақәа»! Идырым Асолдаҭ ибаҟа азааигәара имҩаҧысит аибашьра ду иалиааз ашәақәа рыла еиҿкааз аконцерт. Уи аҧшьнагеит Аҟәа ақалақь ахадара акультура аусбарҭа.

80-шықәса рышьҭахь, Очамчыра араион Отаҧ ақыҭаҿы иаартхеит Аџьынџьтәылатә еибашьра ду аан иҭахаз аҵеицәа ргәаларшәара аҳаҭыр азы рыхьӡқәа зну абаҟа. Ари аусмҩаҧагатә алыршахеит Урыстәыла ахада игрант аҳәаақәа ирҭагӡаны.

Очамчыра ақалақь аҿы шьыжьнаҵы ауаа рацәан. Ргәалаҟазаара бзиан Аиааира амш ныҳәа азгәазҭоз араион ауааҧсыра. Ҳкорреспондент Алиас Корсаиа еиҭеиҳәоит аныҳәа амҩаҧысшьа.

Традициала ишаҧу еиҧш, аибашьра афырхацәа рпортретқәа Леон ипроспект ала Амҳаџьырқәа рыҧшаҳәаҿынӡа, рныҟәара хдыркәшеит Идырым асолдаҭ ибаҟа аҿаҧхьа.

Амемориал аҿы ашәҭқәа шьҭарҵеит Аҧсны Ахада ихаҭыҧуаҩ Беслан Бигәаа, Аҧсны иҟоу Урыстәыла ацҳаражәҳәаҩ Михаил Шургалин , аҧыза-министр Владимир Делба , аиҳабыра алахәылацәа , Жәлар Реизара ахантәаҩы Лаша Ашәба , адепутатцәа , ауаажәларра .

Владимир Путин иҟаиҵаз ааҧхьарала, Аҧсны Ахада Бадра Гәынба официалтә визитла Москва дыҟоуп аиааира ҧшьынҩажәа шықәса ахыҵра иазку аусмҩаҧгатәқәа ихы рылаирхәырц. Владимир Путини Бадра Гәынбеи Кремль Сенаттәи ахан аҿы апарад аламҭалаз еиҧылеит. Путин Гәынба иҭабуп ҳәа иеиҳәеит Москваҟа агәырҕьаратә усмҩаҧгатәқәа рахь дахьнеиз. Ашьыжь асааҭ жәаба рзы Ашҭа Ҟаҧшь аҿы Аиааира апарад иалагеит. Уахь инеит аҳәаанырцә атәылақәа рнапхгаҩцәа, урҭ рыгәҭа Аҧсны Ахада Бадра Гәынба. Апарад иалахәуп шәи ҩажәи жәаба ак техника. Ажәа лымоуп арҭ амшқәа рзы Москва иҟоу ҳкорреспондент Анна Лагәлааҧҳа.