* Aхаша, 20 Хәажәкыр 2024

Аҧсуа режиссиор Наур Гармелиа иусумҭа «Аҵыхәтәантәи ахәҧса» алахәхоит ҩеижәиҩбатәи жәларбжьаратәи акинодебиутқәа рфестиваль «Дух Огня». Ари Ленфильм иаҧнаҵо акиносахьа аметраж дууп. Афестиваль хәажәкырамза ҩажәи хҧа рзы ихацыркхоит Ханты-Мансииск. Афильм Аҧсныи Урыстәылеи ркультура аминистррақәа рыцхыраарала иҭыхуп.

Аӡымҩангақәеи аӡыҭгагақәеи ирыгу ирыбзоу азгәаҭаны, аиҭашьақәыргылатә усурақәа рымҩаҧгара иахҟьеит Аҟәа ақалақь ахәҭак аӡыржәтә ахьрымамыз. Еиҭалҳәоит Фатима Гьергьиаҧҳа .

Гагра ақалақь Абазгаа рымҩа аҿы ақалақь ахаҿра аиҿкааразы уаанӡа ихацыркыз аусқәа ирыцҵоуп. Иахьазы араҟа ҿыц апальмақәа реиҭаҳара нап аркуп. Ари аус быжь миллионк инареиҳаны аҧара ақәхарџьын Гагра араион абиуџьет аҟнытә. Ажәабжь иацылҵоит Сариа Кәарцхьиаҧҳа

Атәыла ареволиуциатә хеилак раҧхьатәи ахантәаҩы, Аҧснытәи АССР ашьаҭаркыҩцәа ируаӡәкыз, дырралеи ҵаралеи инагаз Ефрем Ешба иуаажәларратәи иполитикатәи усура зегь аҧсуа ҳәынҭқарра аргылара иазкын.

Аҟәа, арҵаҩы иҩнаҿы аҵыхәтәантәи имҩахь днаскьаргеит иналукааша аҧсуа ҵарауаҩ-аекономист, аекономикатә ҭҵаарадыррақәа рдоктор, аекономикеи азини ринстиут адиректор, Аҧсны аҭҵаарадырра зҽаҧсазтәыз аусзуҩ Заур Иван-иҧа Шьалашьаа . Уахь инеит ауаажәларратә усзуҩцәа , аҵарауаа, Аҧсны ахада ихаҭыҧуаҩ Бадра Гәынба, ахада иусбарҭа ахантәаҩы Абесалом Кәарҷиа, Аҟәа ақалақь ахада Беслан Ешба, астудентцәа.