Аҧсны Аџьынџьтәылатә еибашьра аветеран Вахтанг Гәаланӡиа агәыҧ «Дельфин» далахәын. Ҩынтә ахәра иоухьан. Аибашьраҿы иааирҧшыз агәаҕьра ҕәҕәазы «Агәымшәаразы амедал» ианашьан. Ҩнызқьи ҩажәи ҩба шықәса рзы Вахтанг Владимир-иҧа Жәлар реизара адепутатс далхын. Уи активла далахәын апарламенттә усура, ҭакҧхықәралагьы иус дазыҟан. Иара ипрофессионалтә ҩаӡареи, иҧсҭазааратә ҧышәеи ааирҧшуан дызлахәыз аекономикатә политикеи, ареформақәеи, аинформациатә технологиақәеи рзы Жәлар реизара ахеилак аҿы, иара убас аграртә политикеи, аҧсабаратә ресурсқәеи аекологиеи рзы ахеилак аҿы. Вахтанг ианакәзаалакгьы даартын, ауаа рыбзиабара ирҳахьан. Арыцҳара иақәшәаз диеиҩсуамызт. Арҭ амшқәа рзы, дыҟамзар ҟалап Аҧсны аӡәы зылахь еиқәымыз. Абас еиҧш залымдарала иҿырҧшыгаз аҧсуа хаҵа иҧсҭазаара ахьҿахҵәаз.