Ажәлар рдоуҳатә мчы имҕьаӡо ахәра анҵоуп. 150 шықәса инареиҳаны изхыҵуа, амҳаџьырра иахаану, аҧсуа жәлар ргәырҩеи ргәырҕьареи рыцеиҩызшоз, Лыхнашҭа асимволқәа ируаку аҭәаҵла ду иаакәыршан хәархьла иҧҟоуп.Ари ахҭыс ҳтәыла-ахы аҵыхәа ауааҧсыра зегьы рхатә хьаак еиҧш ирыдыркылеит. Аекологцәа иҭырҵаауеит аҭәаҵла ҧхьаҟатәи алахьынҵа. Макьаназ иҟоу агәаанагарала, аҵла аҧсҭазаара наӡа азырхынҳәра даараӡа иуадаҩуп. Аҳәынҭқарра Ахада Аслан Бжьаниа ҕәҕәала дақәыӡбеит иҟалаз ахҭыс. Азинхьчаратә усбарҭақәа рнапы ианиҵеит иахәҭоу аусмҩаҧгатәқәа реиҿкаара ацәгьа зуз рхаҭара ашьақәыргыларазы. Ахҭыс инамаданы, Лыхнашҭа иҟаҵаз ааҧхьарақәа ҳкорреспондент Амра Зарандиаҧҳа ланҵамҭаҿ.