Урыстәылатәи Афедерациеи ареспублика Белоруссиеи рышҟа ивизит иазкны апресс- конференциа мҩаҧигеит Аҧсны Ахада Аслан Бжьаниа. Уи аҟны инарҭбааны далацәажәеит имҩаҧысыз аиҧыларақәа ртәы. Аслан Бжьаниа ажурналистцәа ирҭоз азҵаарақәа рхыҧхьаӡараҿ иҟан Женеватәи аиҿцәажәарақәа. Ари аганахь ала Аҧсны Ахада иазгәеиҭеит арҭ аиҿцәажәарақәа аамҭала ишаанкыло, аха ҳаҧхьаҟа урҭ Минск рымҩаҧгаразы аҭагылазаашьа аҧҵазарц шалшо. Аекономикатә еимадарақәа рхырхарҭала Белорусиа Кындыҕ иаргылараны иҟоуп аҧсшьарҭа- курорттә обиект. Аҧсны аҩныҵҟа акәзар, афымцамч аусхк аҿы аиҭакрақәа алагалахоит. Уи азы ҷыдала иаҧҵахоит афымцамчи атранспорти рминистрра.