Ашьха ӡыхьеиҧш ахьахьа-хьаҳәа аҧсшәа бзиа избоит сара, иамаӡамкуа хьаҳәа-ҧаҳәа иқәыҩҩлааит Аҧсынра. Еихышәшәа ицо арҭ ацәаҳәақәа равтор Баграт Шьынқәба диит лаҵарамза 12 рзы. Аҧсны Жәлар рпоет, Ҟабарда-Балкариеи Адыгатәылеи жәлар рышәҟәыҩҩы, Ахьӡ-Аҧша аорден актәи аҩаӡара занашьоу, Дырмит Гәлиа ихьӡ зху аҳәынҭқарратә премиа алауриат Баграт Уасил-иҧа Шьынқәба диижьҭеи 108 шықәса аҵра иазкны ҳтәылаҿы аусмҩаҧгатәқәа еиҿкаан. Аҟәа, ашәҟәыҩҩы ибаҟа аҿы ашәҭқәа шьҭарҵеит, игәалашәара аҿаҧхьа ихырхәеит Аҧсны Ахада ихаҭыҧуаҩ Беслан Бигәаа, аҧыза-министр Владимир Делба, Жәлар реизара аиҳабы Лаша Ашәба, Ахада иусбарҭа аиҳабы Беслан Ешба, аусбарҭақәа рнапхгаҩцәа, аинтелегенциа рхаҭарнакцәа, ашколхәыҷқәа.