Хатәгәаҧхарала Аҧсны еибашьуаз иҭахаз, хынҩажәи жәаба ҭаацәара инарзынаҧшуа рҭаара, ф-республикак рҿы. Абри иалҵшәахеит, мызқәак раҧхьа аиааира 30 шықәса ахыҵра азгәаҭара аҳәаақәа ирҭагӡаны ихацыркыз ауснагӡатә. Хатәгәаҧхарала Аҧсны еибашьуаз, иҭахаз рҭаацәа рҿаҧхьа ихырхәарц ирҭааит Аҧснытәи агәыҳалаларатә фонд «Иаҳгәалашәоит» ахаҭарнакцәа Леонид Лакербаиеи Лиалиа Чамагуеи . Арҭ амшқәа рзы Аахыҵ Уаҧстәылеи Чечентәылеи инхо аҭаацәа рҿы инеины ҭабуп ҳәа рарҳәеит, Аҧсны анапхгара ахьӡала аҳамҭақәа рзыҟарҵеит.