Жәашықәсала ахәажә цәа зхылоз, зымчқәа еиҳа-еиҳа икаҧсоз ахыбра ҩаҧхьа аҧсҭазаара азырхынҳәуп. Аҧсуа усдкылаҩ ибзоураны зеиҭашьақәыргылара алыршоу аҩнеихагыла ду Очамчыра ақалақь агаҿа арлашалоит шьҭарнахыс. Ари отель атуризм знапы алакыу жәларбжьаратәи аиҿкаарақәа «Черноморская жемчужина» ҳәа азырҳәалоит. Аҧсшьарҭа ҩны официалла аартра иазкыз аусмҩаҧгатә иалахәын Аҧсны Ахада Аслан Бжьаниа, аҧыза-министр Александр Анқәаб, ахада иусбарҭа аиҳабы Џьансыхә Нанба. Аҧсшьарҭатә ҩны аофициалла ацаха ҟаҧшь ҧырҟеит Аҧсны Ахада Аслан Бжьаниеи аусдкылаҩ Михаил Сыҷынааи. Анаҩс, аҳәынҭқарра ахада асасааирҭа аҩныҵҟа ирбан. Изеиҭарҳәеит аҧсшьарҭа- зҩыдаратә комплекс аусура шеиҿкаау атәы.