* Aсабша, 29 Абҵара 2025

Аҧсны аҵара аминистрра ф-нызқь екземплиар ажәбатәи аклассқәа рзы агеографиа ашәҟәы ҿыцқәа рынаҭеит ҳреспублика ашколқәа. Арҵагатә шәҟәы аӡыргара мҩаҧысит Аҟәатәи Ашьхарыуаа рышкол аҿы. Иара убасгьы, Аҧснытәи аҳәынҭқарратә унивирситет аҟны иҟоу аквалификациа аизырҳареи акадрқәа реиҭазыҟаҵареи рзы ареспубликатә центр арҵаҩцәа асеминар рзеиҿыркааит.

Азакуанҧҵаҩцәа 2026 шықәсазы ареспубликатә биуџьет иахәаҧшны актәи аҧхьараҿы ирыдыркылеит, иара убасгьы ирыдыркылеит иҳәынҭқарратәым афондқәа быжьба рбиуџьет. Даҽа 20 миллион мааҭ азоужьхоит ЕКО апроцедура хәыда-ҧсада амҩаҧгаразы апрограмма. 

2026-2030 шш.рзы ареспублика асоциал-економикатә ҿиара аҳәынҭқарратә программа анагӡаразы Аҧсныи Урыстәылеи рыбжьара аиқәшаҳаҭра апроект рыдыркылеит аминистрцәа. Ҳазҭалоу ашықәс ҿыц инаркны аҳәынҭқарратә усбарҭақәау русзуҩцәа руалафахәы ацҵара азгәаҭоуп. Ирылацәажәан егьырҭ азҵаарақәа жәпакы.