Арт-фестиваль «Аҧшаҳәаҟны анеиааира»

25.09.2020 289
Иван Папасқьыр ихьӡ зху Амилаҭтә библиотека аҿы имҩаҧысит аабатәи жәларбжьаратәи аҿартә арт-фестиваль «Аҧшаҳәаҟны анеиааира» захьӡу. Афестиваль аусура еиҿкаауп еиуеиҧшым ахырхарҭақәа рыла , асааҭ жәаҩа инаркны уаха асааҭ жәбанӡа. Афестиваль иасасцәоуп еиуеиҧшым урыстәылатәи абиблиотекақәа рхаҭарнакцәа.

Традициак иаҩызахаз жәларбжьаратәи Афестиваль «Амшын аҧшаҳәаҿтәи анеиааира» аатит асааҭ жәаҩа рзы. Аиҿкааҩцәа ражәақәа рыла, аусмҩаҧгатә хықәкқәас иамоуп ашәҟәы аӡыргара, ашәҟәыҧхьара аларҵәара, аҿар рдыррақәа реизырҳара.

Аҿартә арт-фестиваль аҟны еиҿкаауп еиуеиҧшым атематикатә усуратә ҭыҧқәа. Алитературеи абиблиотекақәеи амузеи рҭыҧ, лаҧшылатәи аҟазареи амилаҭтә напҟазареи, аспорт еицлабрақәа рҭыҧ. Иара убас еиҿкаауп ахәыҷқәа рзы амилаҭқәа рхеилакқәа , агәыҳалалратә уҳәа акəакьқәа. Амодеи, акәашареи, амузыкеи рҭыҧ асценаҿы иалхын. Араҟа иқәгылон Аҧсны араионқәеи Урыстәыла атәылаҿацәқәеи рҟнытә еиуеиҧшым ансамбльқәа. Маиҟәаҧынтәи иааз акәашаратә гәыҧ араҟа иқәгылеит.

Амузеи аҭыҧ ҳалацәажәозар, урҭ есышықәса ари афестиваль рхы аладырхәуеит. Сынтәа дара рцәыргақәҵа егьырҭ ашықәсқәа иаарылукаартә иҟоуп. Ахәаҧшыҩцәа ирыдгалан Аҧсны раҧхьатәи Ахада Владислав Арӡынба иныҟәигоз акәадыр.

Иазгәаҭатәуп ,Тҟәарчал Евстафи Аҧсилтәи ихьӡ ала ауахәама аргылара азы арт-фестиваль аҳәаақәа ирҭагӡаны акультура-гәыҳалалратә фонд ишеиҿнакааз ацәашьқәеи, аҧшьасахьақәеи, иара убас аиашатә динхаҵара асимволқәеи ахьырҭиуаз аҭыҧ. Урҭ ирыҭныҵуа аҧара ауахәама аргыларахь ишьҭхоит.

Иара убас , ҳалаҧш иҵашәеит, афестиваль аҳәаақәа ирҭагӡаны имҩаҧысуаз ашәҟәыеиҭныҧсахлара «уанаҧхьалак - даҽаӡәы иҭ» захьӡу.

Афестиваль аҿы зегьы иаарылукаартә аус рыдулан ицәыргаз аҭыхымҭақәа.

Афестиваль «Амшын аҧшаҳәаҿтәи анеиааира» аҭааҩцәа ицәыргоу атематикатә усуратә ҭыҧқәа зегьы аинтерес рзаҵан, хаҭа-хаҭала акәакьқәа зегьы ирылсны агәыҳалалратә акциа рыхәҭа аларгалеит.

Лаура Қаҧшьҧҳа, Алықьса Баструков, АТ.
  • ТЭГИ: