Гәлрыҧшь араион Ҵабал ақыҭан имҩаҧысит Аҧсныи Урыстәылеи рыруаа еицырзеиҧшуа аҽазыҟаҵарақәа.

24.09.2020 84
Гәлрыҧшь араион Ҵабал ақыҭан имҩаҧысит Аҧсныи Урыстәылеи рыруаа еицырзеиҧшуа аҽазыҟаҵарақәа. Дара еиҿкаан астратегиатә команда- штабтә ҽазыҟаҵарақәа «Кавказ ҩнызқьи ҩажәа» аҳәаақәа ирҭагӡаны. Аҽазыҟаҵарақәа реиҿкаашьа гәеиҭон Аҧсны Ахада арбџьармчқәа ркомандаҟаҵаҩ хада Аслан Бжьаниа.

«Кавказ ҩнызқьи ҩажәа» ҳәа хьӡыс измоу сынтәа Урыстәыла арегионқәа рҟны еиҿкаау аҽазыҟаҵарақәа ирылахәуп Ермантәыла Иран уҳәа атәылақәа жәпакы рыруаа. Арҭ аҽазыҟаҵарақәа убасгьы имҩаҧысуеит Аҧсны Урыстәыла Атәылахьчара аминистрра абыжьбатәи ар рбазеи, афедералтә аҳәаахьчаратәи, ареспублика Атәылахьчара аминистрра архәҭақәеи рхаҭарнакцәа алархәны.

Аҧшьашаҽны ,Ҵабал имҩаҧгаз аҽазыҟаҵарақәа реиҿкаашьа гәеиҭон Аҧсны Ахада, Арбџьармчқәа ркомандаҟаҵаҩ хада Аслан Бжьаниа.

Аҽазыҟаҵарақәа рымаҧгара иалагеит асааҭ жәаба рзы. Ашьхақәа рганахь ала, Кәдрытәи аиҩхаа иҭаланы иаауаз аҕа ирхәҭақәа раҧхьа ахымца рыжәырҵеит ахара ахы назго абзарбзанқәа рыла. Анаҩс, Аҧсны арра- ҳаиртә мчқәа реибашьыгатә вертолиотқәа аруаа ацхыраара рырҭеит.

Шьхала иаауаз ақәылаҩцәа рырратә техника аанкыларазы излаауаз амҩа ҧыржәеит.Аиҿахысра ҕәҕәақәа шцозгьы, аиҩхаа иҭалан иаауаз ҧхьаҟа ацара анырцәыуадаҩха , рхы иадырхәеит арҭҟәацга зҭаз автомашьына.

Анаҩс ажәылара иалагеит аршьаҟауаа. Иқәылоз хьаҵны иандәықәла, ахымца рыжәырҵеит Аҧсны арра- ҳаиртә мчқәа рвертолиотқәа.

Анаҩс аидысларақәа ахьцоз идыртәеит адесант. Абасала, қәылара иаауаз реиҳараҩык ҭарханы рышьҭахьҟа ихьацан аҽазыҟаҵарақәа рымҩаҧгара алегенда инақәыршәаны.

Аҧсны Ахада, Арбџьармчқәа ркомандаҟаҵаҩ хада Аслан Бжьаниа аҽазыҟаҵарақәа реиҿкаашьа ахәшьара ҳаракы аиҭеит. Анаҩс, Урыстәылатәи абыжьбатәи ар рбаза акомандаҟаҵаҩ Аҧсны Ахада изеиҭеиҳәеит аҽазыҟаҵарақәа рымҩаҧгара аан ахархәара зызуз аимадага амашьынақәеи, аҧырҩы дызҭатәам зхала иҧыруа аҧшыхәгатә ҳаирплан хәыҷи ахы рархәашьеи рымҩаҧгашьеи.

Арҭ аҽазыҟаҵарақәа ирылахәыз ҳархәҭақәа ируакын Аҧсны Атәылахьчара аминистрра адҵа ҷыдақәа назыгӡо агәыҧ. Аслан Бжьаниа уи аруаа хаҭа-хаҭала аҧсшәа раҳәаны, иҭабуп ҳәа реиҳәеит аҽазыҟаҵарақәа рымҩаҧгара аан иаадырҧшыз арратә зыҟаҵара бзиа азы.

Даур Инаҧшьба, Алықьса Агəхаа, АТ.







  • ТЭГИ: