84 шықәса дшырҭагылаз иҧсҭазаара далҵит ауаажәларратә усзуҩ Иури Спиридон - иҧа Латариа.

14.09.2020 48
84 шықәса дшырҭагылаз иҧсҭазаара далҵит ауаажәларратә усзуҩ Иури Спиридон - иҧа Латариа. Аҧсны аҳаиртә усхки , Жәлар Реизареи , аполиткатә репрессиақәа раан иҭархаз Рассоциациеи уҳәа еиуеиҧшым амаҵзуратә ҭыҧқәа рҿы аус иухьан . Арепрессиақәа раан Аҧснынтә хабарда ибжьаӡыз ирызку ашәҟәы авторс дамоуп .Ауаажәларратә усқәа рзы иааҧсараз «Ахьӡ –аҧша» аорден ахҧатәи аҩаӡара ианашьоуп.

Владислав Арӡынба ихьӡ зху Жәларбжьаратәи аҳаиртә баҕәаза анаадырт ашьҭахьгьы, еиуеиҧшым ашықәсқәа рзы, аамҭа иашьашәалоу ала аиҕьтәразы изнысуаз аетапқәа зегьы дрылахәын аҳаиртә бьаҕәаза азанааҭ ала аус зуа Иури Спиридон –иҧа Латариа . Иара хынҩажәи жәабатәи ашықәсқәа рзы Аҧсны аҳаиртә усхк аҿы аусура далагеит, Аҟәатәи аҳаиртә гәыҧ анапхгаҩы ихаҭыҧуаҩыс дыҟан. 1983 -1990-тəи ашықәсқәа рзы Аҟәатәи еидҵоу аҳаиртә гәыҧ данапхгаҩын. Аҧсны мацара акәымкәа Асовет Еидгыла авиациаҿгьы зыҧсы ҭоу аенциклопедиа ҳәа изырҳәон изанааҭ инарҵауланы иахьидыруаз азы. Урыстәылатәи аурыс журналистцәа ааны иҿцәажәон . Ари ижәбо анҵамҭа ҟаҵан 1988 шықәсазы, Урыстәыла ателехәаҧшра аинформациатә программа «ВРЕМЯ» аҿы.
Иахьа аҳаирбаҕәазаҿы аус зуа Беслан Џьениа аусура далагеит 1984 шықәсазы . Усҟан Иури Латариа Аҟәатәи Еиду авиациатә гәыҧ командаҟаҵаҩыс дыҟан .

Иури Латариа 1957 шықәсазы далгеит Харковтәи авиациатә аштурмантә ҵараиурҭа .1968 шықәсазы Ленинградтәи Академиа Атәылауаҩратә авиациа аҿы иҵара хиркəшеит. Зқьи жәшәи ҧшьынҩажәи жәаба шықәса рзы Зегьеидгылоутәи аграждантә авиациа аминистрра ақәҵарала, Иури Сҧиридон- иҧа ддәықәҵан Чехословакиатәи ареспубликахь аерофлот ахаҭарнак хадас. Беслан Џьениа игәалашәоит, Иури Спиридон –иҧа ицамҭаз иҩызцәа ҳамҭас ателербага шриҭаз .

Иури Спиридон- иҧа ихәыҷрашықәсқәа амыҟәмабарақәа рыцын .Арепрессиа аамҭақәа ирылиааз, хы-шықәса анихыҵуаз, иаб Спиридон ддырбаандаҩуеит. Арҭ аамҭа еиқәаҵәақәа наунагӡа игәаҿы рышьҭамҭа аанрыжьит, еснагь игәалашәон. Иури Спиридон- иҧа аҭыжьра дахьӡеит хабарда ибжьаӡыз ирызкны ашәҟәы. Иазгәаҭатәуп, иара аполиткатә репрессиақәа раан иҭархаз Аҧснытәи рассоциациа ахантәаҩыс дшыҟаз.
Зқьи жәшәи ҧшьынҩажәи хәба шықәса инаркны, зқьи жәшәи ҧшьынҩажәи жәаҩа шықәсанӡа Иури Латариа Аҧсны Иреиҳаӡоу Асовет ажәеизатәи ааҧхьара адепутатс дыҟан. Ҩнызқьи хышықәса инаркны Аҧсны Жәлар Реизара аусбарҭа аҟәша аиҳабыс дыҟан.

Иури Спиридон –иҧа иҧсҭазаара зегьы хҭысла иҭәын, ирацәоуп еиуеиҧшым аамҭақәа рзы иҧылоз ауадаҩрақәа, аха убарҭқәа зегьы дыриааины иус гәыкала инаигӡон. Иури Спиридон иҧа ҩыџьа ахшара драбуп, ирызҳауеит имаҭацәа.


Иури Спиридон иҧа Латариа иҧсыжра аиҿкааразы аиҳабыратә комиссиа аҧҵоуп. Аҧсыжра ҟалоит аҩаша , цәыббра жәохә рзы,  Аҭара ақыҭан. 
 
Дениза Гьергьиаҧҳа , Михаил Братухин,АТ.



  • ТЭГИ:
24.09.2020 14 Аҭоурыхтә фотоцәыргақәҵа аатит Каман ақыҭан иҟоу Иоанн Ахьтәыҿаҧыц иҧш...
Уаҟа ицәыргоуп урыстәылатәи аҭауадцәа Романавааи аҧсуа ҭауадцәа Ачба-Шервашиӡеи рфотоҭосахьақәа.
24.09.2020 10 Аҧсны иааны иҟоуп Нхыҵ-Кавказтәи афедералтә университет аҿынтә аделега...
Аделегациа аҭааит Аҧсны Аҭҵаарадыррақәа Ракадемиа, иара убас Дырмит Гәлиа ихьӡ зху Аҧсуаҭҵааратә институти дареи ирыбжьарҵеит аусеицуразы аиқәшаҳаҭра.